Mat 5 | MHL | STEP | Yeesus yakeyak maneka naap wia urufap ema urupep pokak. Naeya ona teeria pun ookap urupemi o warikap mamaiya pokiwkin opora wia maakek.

Matthew 5

Yeesus wi emeria mua opora wia wafuromak

(Luk 6.20-23)

1 Yeesus yakeyak maneka naap wia urufap ema urupep pokak. Naeya ona teeria pun ookap urupemi o warikap mamaiya pokiwkin opora wia maakek. 3 Feenap wia maakek,

“Wi emeria mua wiam porop Mua Maneka ooku naep onimik nain wi kemeluk. Moram wi Mua Maneka pika kemena-pa wiar ikaikuan.
4 Wi kema fufurarimik nain wi kemeluk. Ikoka Mua Maneka-ke wia saliwinon.
5 Wi mua kekelkiya ikaimik nain kemeluk. Miiwa unowa wis-keriw ikaikuan.
6 Wi kakeniw ikowa kema manekiw ikemik nain wi kemeluk, wi kema tenikuan.
7 Wi mua wia saliwowa kemaiw ikaimik nain, wi kemeluk. Mua Maneka pun wia saliwinon.
8 Wi mua kema tumin marew Mua Maneka kemaiw ikemik nain, wi kemeluk. Ikoka Mua Maneka urufikuan.
9 Wi saria wiemi sira eliwa wia pokomowimik nain, wi kemeluk. Mua Maneka yena muuka-ke wia nainon.
10 Wi mua Mua Maneka opora ookami sira eliwa onimik, ne mua papako-ke wia samoriwkin me piipuimik, wi nain kemeluk. Wi owow iinan Mua Maneka pika kemena-pa wiar ikaikuan.
11 Ni yo muuta nain kema nia bagiwirap sirirowa sira-sira niemi wadol opora nia opawuk-na ni kemeleka. 12 Ni sirirowa niimik nain iiriw wi profet pun naap wiem-ikemik. Naapeya nis pun kemelow manekiw ikeka, moram ni maa muuna maneka owow iinan-pa niar ikua, ikoka nia kiripominon,” naap wia maakek.

Ifer masia ne parina arekin opora

(Mak 9.50, Luk 14.34-35)

13 Aria Yeesus opora oko wia maakemi feenap anianiw wia kaisomak. “Ni miiwa-pa ikeman fain ifer masia saarik ikeman. Ifer masia-ke dabelalep masia ikiwinon-na kamenap oniwkin masia kiiriw imenarinon? Me pepek, dabela naap nain maa enowa-pa wuiwkin maa me afililinon. Naapeya wafuriwkin mua-ke soomaremi akup-ititikuan.

14 Ne ni miiw maneka fain parina saarik ikeman. Owowa ema iinan-pa ikua nain me pipilalep ikaiya. 15 Ni amisareman, parina isimap amina me pakokor-erimik, weetak. Epa maneka-pa wuiwkin mua koora-pa ikemik nain maa urufimik. 16 Naapeya niena sira eliwa nain-ke parina saarik, ariman akena wilinem-ikaeya emeria mua unowa niar urufikuan. Ne sira eliwa oniman nain niar urufap niena Niawi owow iinan-pa ikua nain unuma fakeruk.”

Yeesus Moses sira wuak nain maek

17 “Ni feenap efa maiman-i? Yo ekapem nain Moses sira wuomakek nain ne wi profet opora nia maakem-ikemik nain wiar iirarowa naep ekapok, naap efa maiman-i? Weetak, yo me nain ekapem. Yo muut fain ekapem, wi iiriw opora maem-ikemik nain wiar makena arowowa naep ekapem. 18 Yo maken akena nia maakiyem, Moses sira wuomakek nain, opor ara gelemuta-ko me mesenalinon, weetak. Sira iiwawun naap ikaeya sira unowa fain iiwawun pepek aromakinon. Naap ikaeya iiwawun aapereka ne miiwa fain weeserinon. 19 Naapeya mua eena Mua Maneka sira wuomakek nain ara kuisow wiar puukami mua papako pun naap onowa wia suuwinon-na Mua Maneka pika kemena-pa meta marew akena ikainon. Ne mua eena sira nain baliwep wiar ookami mua oko naap onowa wia maakinon-na Mua Maneka pika kemena-pa unum maneka aawinon. 20 Yo makena nia maakiyem, wi Farisi ne wi sira amis mua sira mutumut ook-afurap i mua kakeniw-ke wiam naimik. Nain nis-ke sira unowa ookowa nain me wia nomakowen-na Mua Maneka pika kemena me wiar ekowen.” Naap wia maakek.

Opora kakenowa sira

(Luk 12.57-59)

21 Ne Yeesus kiiriw feenap wia maakek, “Aria iiriw mua iperowa feenap maem-ikemik nain wiar miimami ookam-ikeman, ‘Ni mua me wia ifakimeka, mua-ko naap oninon-na pina wiar ikainon.’ 22 Nain aakisa yos-ke feenap nia maakinen, mua-ko ona wiamun kema bagiwirinon-na pina wiar ikainon. Ne ona wiamun amukaremi mainon-na, ‘No mua kema momora, kema pukow marew,’ naap maakinon-na pina maneka wiar ikainon. Naeya wi owow woos mua-ke o opora-pa wuowa-ke ikua. Ne mua oko-ko mua oko amukaremi maakinon-na, ‘No momor asia,’ naap maakinon-na umemi epa mukuna ikiwowa-ke ikainon.

23 Aria no maa eliwa-ko Mua Maneka patirowa naep pikiwem-ikon. Nain nena niamun nefa amukarowa ikua nain kema suuwap-na maa unowa neeke wuap-puap kirep ikiwep niamun ikos opora kakenap kema eliwa arep ekapemi Mua Maneka patire.

25 Aria mua-ko opora-pa nefa wuinok-na anim onoma ewur me wiar arowa ikok era-pa ikiwemi mua nain ikos opora kakeneka. Naeya anim onoma wiarik me nefa pikiwinok. Oko opora me kakenowa ikaeya nefa pikiwep opora nefa nomakep medistret wapena-pa nefa wuinon. Ne wis-ke ami mua wapena-pa nefa wuiwkin koora nefa pekikuan. 26 Yo makena maiyem, no koora-pa ikon nain ewur me weeserinan. Nena pina onan nain name sesenarep-na eliw orainan.”

Enum eruarowa sira

27 “Aria iiriw sira eena kae-pa ekapok nain feenap maimik, ‘Soma me oreka.’ 28 Nain aakisa yos-ke feenap nia maakiyem, mua oko-ko emeria oko mokoka toonep urufinon-na mua nain ona kema-pa emeria nain sira samora wameiya onak nainen. 29 Nena mokok okaiwi-ke sira samora onowa nefa mufinok-na pusunowap wafure! Mokoka okaiwi kuisow wafurowa eliw, oko mia ara unowa oram mukuna-pa yoowa aawinan. 30 Ne oko, nena wapen okaiwi-ke pina onowa nefa mufinok-na wapena nain puukap wafure! Mia ara nain puukap wafurinan-na eliw, oko nain-ke sira samora-pa nefa mufeya epa samora-pa neeke sirirowa maneka aawem-ikainan.”

Emeria wia iirarowa sira

(Matiu 19.9, Mak 10.11-12, Luk 16.18)

31 “Ne opora fain pun iiriw maemik, ‘Mua oko-ko emeria iiraremi-na muewowa puukowa opora nain maifa-pa siisimep iwinok.’ 32 Nain yos-ke feenap nia maakiyem, mua ona emeria iirarowa-ko me ikua. Emeria-ke soma orainon-na makena, eliw iirarinon. Nena emeria pina marew ikua nain iirareya mua oko ookinon-na soma orowa saarik oniya. Ne mua o aawiya nain Mua Maneka mokoka-pa pina onamik wia nainon.”

Opor koonowowa sira

33 “Aria iiriw sira eena kae-pa ekapok nain feenap wiar miimam-ikeman. ‘No opora makena maep koonowan nain makena wia opoma. Ne Mua Maneka opora maakemi makena naep koonowan nain pun kakeniw naap ookam-ike,’ naap maiwkin miimaman. 34 Ne aakisa yos-ke feenap nia maakiyem, opora makena maep me koonoweka. Owow iinan unufami opora me koonoweka, moram owow iinan-na Mua Maneka ona pokiya nain samapora-ke. 35 Ne miiwa unufami opora me koonoweka, moram miiwa-na Mua Maneka pokami kepura akupiya nain toor-ke. Ne Yerusalem pun me unufeka, moram Yerusalem-na yiena Maneka owowa-ke. 36 Ne nena woosa unufami opora me koonowe. Moram ikiwosa kekanowa marew, nena afif onoma kui-kuisow kiripeya kia-i e sepa me imenarinon, weetak. 37 Ni opora maiman nain makeniya-na makena naep-pueka ne weetak, aa weetak naep-pueka. Muut naap maeka. Oram opora unowa aakunemi opora oko-ko onowen-na ni wadolalowen.”

Wapen kiripowa sira

(Luk 6.29-30)

38 “Aria iiriw kae sira feenap maiwkin ookam-ikeman, ‘Mua-ko nefa arufami mokoka nefar samorinok-na nos pun kiripami mokoka kuisow wiar samore. Ne mua-ko nefa arufami eneka kuisow nefar teekinok-na nos pun kiripami eneka kuisow wiar teeke,’ naap maem-ikemik. 39 Nain aakisa yos-ke feenap nia maakiyem, mua-ko sira kamenap nefa oninok-na me kiripoma. Ne mua-ko kumunkura-pa nefa arufinok-na kireya okaiwi-pa eliw nefa arufinok. 40 Ne oko pun, mua oko-ko nena mia suuwowa orawin nain opora-pa nefa wuinok-na me asipe. Nain aawemi konim kuruma name wakesimin nain pun nefar aawinok. 41 Aria ami mua-ke ona maa unowa akuawomep lawisik epasia amapikiwomep epa neek wuowa nefa maakinok-na nos-ke akuawomami epa nain nomakep lawisik pirirap wue. 42 Ne oko pun, mua oko-ko maa nefa nomarinok-na iwe, ne mua oko-ko muuna nefa wuinen nainok-na eliw naakemi iwe.”

Nena iiwua wia kookalowa sira

(Luk 6.27-28 ne 6.32-36)

43 Aria sira fain pun maiwkin miimaman, ‘Owow epaskun niam kookaleka, ne ni nia iiwuarimik nain wia samoram-ikeka.’ 44 Nain aakisa yos-ke feenap nia maakiyem, niena iiwua wia kookaleka ne wi sirirowa niimik nain feenap oneka, Mua Maneka wia saliweya eliw ikauk naep o fareka. 45 Naap onowen-na niena Niawi owow iinan-pa ikua nain yena muuka-ke nia nainon. Moram os-ke ama parina emeria mua eliwa ne samora iiwawun epaskun maneka yia sesekomiya. Ne ipia pun naapiw oniya. 46 Aria wi mua nia kookalimik nain muutiw wia kookalowen-na, Mua Maneka sira eliwa niar naep nia kiripominon-i? Weetak. Wi takis aawow mua pun sira naap onimik. 47 Ni niena teeria muutiw sira eliwa wia oniman nain sira eliwa-ke nia nainen-i? Weetak, wi mua papako pun sira naapiw onimik. Ne wi owow oko oko teeria pun sira nain ookimik. 48 Naapeya ni sira kakeniw akena ikeka, niena Niawi owow iinan-pa ikaiya naap, naap akena ikeka.”